تہران(این این آئی)ایران اور وینزویلا کے لیے وائٹ ہائوس کے خصوصی ایلچی ایلیوٹ ابرامس نے متنبہ کیا ہے کہ امریکا وینزویلا کو بھیجے جانے والے طویل فاصلے تک مار کرنے والے میزائلوں کو تباہ کر دے گا۔امریکی ٹیلی ویژن نیٹ ورک سے انٹرویومیں انہوں نے کہا کہ صدرڈونلڈ ٹرمپ کی انتظامیہ اس صورتحال سے بچنے کے لیے پوری کوشش کرے گی۔ اگر وینزویلا کو ایران کی طرف سے میزائل فراہم کیے جاتے ہیں توامریکا ایرانی میزائلوں کو تباہ کر دے گا۔مختلف ذرائع ابلاغ کے حالیہ دنوں میں یہ اشارہ دیا گیا ہے کہ تہران اور کراکس کے مابین کوئی میزائل معاہدہ نہیں ہوا ہے لیکن ایران نے اسلحہ فروخت کرنے کے اپنے ارادے کا اعلان کیا ہے اور وینزویلا اس کا ایک بڑا گاہک ہو سکتا ہے۔
