اسلام آباد (این این آئی)رواں مالی سال کے پہلے چھ ماہ میں ہدف سے زائد برآمدات ہوئیں ۔ مشیر تجارت عبدالرزاق داؤد کی زیر صدارت بیرونی تجارت کے حوالے سے اجلاس ہوا جس میں بتایاگیاکہ رواں مالی سال کے پہلے چھ ماہ میں ہدف سے زائد برآمدات ہوئیں ،رواں مالی سال کے پہلے چھ ماہ میں برآمدات میں مجموعی طور پر 25 فیصد کا اضافہ ہوا۔ بتایاگیاکہ رواں مالی سال کی پہلی ششماہی میں 15 ارب 12 کروڑ 50 لاکھ ڈالر کی برآمدات ہوئیں، گزشتہ مالی سال اسی عرصے میں 12 ارب 11 کروڑ ڈالر کی کل برآمدات تھیں۔ بتایاگیاکہ رواں مالی سال کے پہلے چھ ماہ میں 15 ارب ڈالر کا کل ہدف رکھا گیا جسے حاصل کیا گیا۔مشیر تجارت کو وزارت تجارت حکام کی تجارتی اعدادوشمار پر بریفنگ دی گئی جس میں بتایاگیا کہ ماہ دسمبر میں گزشتہ مالی سال دسمبر کے مقابلے میں پاکستانی برآمدات میں 16.7 فیصد کا اضافہ ہوا، ماہ دسمبر میں 2 ارب 76 کروڑ 10 لاکھ ڈالر کی کل برآمدات رہیں۔ بتایاگیاکہ گزشتہ سال دسمبر میں کل برآمدات 2 ارب 36 کروڑ 60 لاکھ ڈالر کی تھیں،زشتہ مالی سال دسمبر کے مقابلے میں رواں مالی سال برآمدات میں 40 کروڑ ڈالر کا اضافہ ہوا۔ بتایاگیاکہ رواں مالی سال دسمبر میں برآمدات کا ہدف 2 ارب 80 کروڑ ڈالر تھا، ایک سال میں مچھلی اور متعلقہ مصنوعات، پلاسٹکس، سیمنٹ، فروٹ اور سبزیوں کی برآمدات میں اضافہ ہوا۔ بتایاگیاکہ بنگلہ دیش، تھائی لینڈ، سری لنکا، ملائیشیا، قازقستان اور جنوبی کوریا کو برآمدات میں اضافہ ہوا، مردانہ گارمنٹس، ہوم ٹیکسٹائل، چاول، خواتین کے گارمنٹس، جرسی اور ٹی شرٹ کی برآمدات میں بھی اضافہ ہوا۔ بتایاگیاکہ ہروایتی مارکیٹوں میں امریکہ، چین، نیدرلینڈز اور اسپین کو برآمدات میں اضافہ ہوا۔ بتایاگیاکہ برطانیہ، جرمنی، افغانستان، روس، انڈونیشیا اور چیک ریپبلک کو برآمدات میں کمی ہوئی۔ مشیر تجارت عبد الرزاق دائود نے وزارت تجارت کو برآمدات میں اضافہ کو برقرار رکھنے اور نگرانی کی ہدایت کی ۔ مشیر تجارت نے برآمدات میں تسلسل کیلئے ضروری اقدامات کی بھی ہدایت کی ۔
