لاہور( این این آئی)چونگی امر سدھو کے علاقہ گلستان کالونی میں ایک گھر میں ہیٹر کی وجہ سے آتشزدگی اور دھواں بھرنے سے تین کمسن بچے جاں بحق جبکہ ماں باپ اور تین بچے زخمی ہو گئے ،زخمیوں کو طبی امداد کے لئے جنرل ہسپتال منتقل کر دیا گیا۔بتایا گیا ہے کہ چونگی امرسدھو کے علاقہ گلستان کالونی میں واقع ایک گھر کے مکینوں نے سردی کی شدت کم کرنے کے لئے ہیٹر جلا کر سوئے جس سے آگ بھڑک اٹھی ۔دھواں بھرنے اور آتشزدگی سے دو کم سن بہنیں او رایک بھائی جاں بحق جبکہ ماں باپ اور تین بچے زخمی ہو گئے ۔بتایا گیا ہے کہ اہل علاقہ نے اپنی مدد آپ کے تحت بھی آگ بجھانے کی کوشش کی مگر آ گ کی شدت بہت زیادہ تھی۔زخمیوں کو ریسکیو جنرل ہسپتال منتقل کر دیا گیا ہے ۔ بتایا گیا ہے کہ ہیٹر کے قریب کھڑی کی گئی موٹر سائیکل آگ لگنے کا باعث بنی۔آگ میں جھلس کر جاں بحق ہونے والوں میں 2سالہ علی عباس، 4 سالہ زہرا،6 سالہ لاریب جبکہ زخمیوں میں مراتب علی ، فرزانہ اور تین بیٹے علی رضا،علی حسن اور علی حمزہ شامل ہیں۔
