اسلام آباد (این این آئی) وفاقی وزیر برائے بین الصوبائی رابطہ فہمیدہ مرزا اور وزیر اعظم کے معاون خصوصی برائے سندھ افیرز ڈاکٹر ارباب غلام رحیم نے پاکستان تحریک انصاف کے وائس چیئرمین و وزیر خارجہ مخدوم شاہ محمود قریشی سے ملاقات کی جس میں سندھ حقوق مارچ کے حوالے سے تفصیلی تبادلہ خیال کیا گیا ۔ جاری اعلامیہ کے مطابق ڈاکٹر ارباب غلام رحیم نے”سندھ حقوق مارچ”کے انتظامات اور تیاریوں کے حوالے سے وائس چیئرمین پاکستان تحریک انصاف مخدوم شاہ محمود قریشی کو مفصل بریفنگ دی گئی ۔وزیر خارجہ نے سندھ حقوق مارچ کی تیاریوں پر اطمینان کا اظہار کرتے ہوئے کہا کہ پاکستان تحریک انصاف سندھ کے پسے ہوئے عوام کو کسی صورت تنہا نہیں چھوڑے گی ۔ شاہ محمود قریشی نے کہاکہ پاکستان تحریک انصاف سندھ کے پسماندہ علاقوں کی تعمیر و ترقی اور سندھ کے عوام کو حقوق کی فراہمی کیلئے اپنی جدوجہد جاری رکھنے کیلئے پر عزم ہے
