لاہور(این این آئی) پیپلز پارٹی پنجاب کے صدر قمر زمان کائرہ نے کہا ہے کہ وزیراعظم اپوزیشن کی تقسیم کے خواب دیکھنا بند کردیں،پنجاب میں ترجمانوں کی اکھاڑ پچھاڑ انکی بوکھلاہٹ ظاہر کرتی ہے۔ اپنے بیان میں انہوںنے کہاکہ حکومت اپنے چہرے کے داغ ٹھیک کرنے کی بجائے آئینہ صاف کرنے پر لگی ہوئی ہے۔محکمہ شماریات کے تازہ اعداد و شمار حکومت کے منہ پر تماچہ ہیں۔عام آدمی کیلئے کچن چلانا مشکل ہوگیا ، سبزیاں قوت خرید سے باہر ہو گئی ہیں۔ صنعت کاروں کو آج پھر بڑا پیکج دیا گیا۔ غریبوں کیلئے انکے پاس کوئی سبسڈی نہیں ،حکمرانوں کو گھر نہ بھیجا گیا تو یہ غریبوں کا بھرگھس نکال دیں گے۔
