اسلام آباد (این این آئی) پاکستان پیپلز پارٹی کی نائب صدر سینیٹر شیری رحمن نے کہا ہے کہ آئین کی بالادستی، جمہوریت کے استحکام کیلئے نظریہ ضرورت دفن کرنا ضروری تھا۔ سپریم کورٹ کے گزشتہ روز کے فیصلے پر ردعمل دیتے ہوئے سینیٹر شیری رحمٰن نے کہا کہ فیصلے نے قوم کا سر فخر سے بلند کر دیا ہے۔شیری رحمن نے کہا کہ عدالت کا فیصلہ سب کیلئے پیغام ہے کہ آئین سے بالا کوئی بھی نہیں، اسپیکر کی رولنگ اور اسمبلی تحلیل کرنا غیر آئینی تھا۔پیپلز پارٹی کی نائب صدر نے کہا کہ شکست سے بچنے کیلئے آئین کی ایک نہیں 3 بار خلاف ورزی کی گئی، آئین و جمہوریت کی جدوجہد میں تحریک انصاف کا کوئی کردار نہیں۔شیری رحمن نے کہا کہ تحریک انصاف آئین کی اہمیت سے واقف ہی نہیں، عدالت نے ثابت کر دیا ملک کی سالمیت آئین پر عمل درآمد، حکمرانی میں ہے۔
