اسلام آباد (این این آئی)(ن)لیگ کی رکن اسمبلی مریم اورنگزیب نے سپیکر کی توجہ دلائی اور سپیکر نے پارلیمنٹ کے میڈیا ہاؤس کو میڈیا کیلئے کھول دیا۔ ہفتہ کو ایوان میں اظہار خیال کرتے ہوئے مریم اور نگزیب نے کہاکہ سپیکر صاحب کو مبارکباد پیش کرتی ہوں ،آپ کے دور میں جمہوری اور پارلیمانی روایات مزید مستحکم ہوں گی۔ انہوںنے کہاکہ آج سے ساڑھے تین سال پہلے پارلیمنٹ کے میڈیا کارنر کو بند کیاگیا ،پارلیمنٹ کے میڈیا سینٹر میں میڈیا کا داخلہ بند کیا گیا،پارلیمنٹ لاجز میں میڈیا کو بند کیا گیا،میڈیا پر سنسر شپ اور زبان بندی کی گئی_ میڈیا مکمل زیر عتاب رہا۔ انہوںنے کہاکہ پارلیمانی رپورٹرز ایسوسی ایشن کابھی مطالبہ رہا ہے کہ میڈیا سینیٹر کو میڈیا کے لیے کھولا جائے،میری پوری پارلیمنٹ کی طرف سے استدعا ہے کہ میڈیا سینٹر کو آج ہی کھولا جائے۔ سپیکر راجا پرویز اشرف نے پارلیمنٹ کا میڈیا سینٹر کھولنے کا حکم دے دیا۔اسپیکر راجا پرویز اشرف نے ہدایت کی کہ میں قومی اسمبلی سییکریٹیریٹ کو ہدایت کرتا ہوں کہ میڈیا سینٹر کو میڈیا کے لیے فوری کھولا جائے_
