اسلام آباد (این این آئی)پاکستان بھر کے صحافیوں کی نمائندہ تنظیم (پی ایف یو جے) کا سابق وزیراعظم عمران خان سے صحافیوں کے خلاف ثبوت دینے یا پھر معافی مانگنے کا مطالبہ کیا ہے ۔صدر اور سیکرٹری جنرل نے مشترکہ بیان میں کہاکہ ثبوت دیں، آپ کی حکومت گرانے میں صحافی ملوث ہیں، پی ایف یو جے تحقیقات اور کارروائی کرے گی۔ پی ایف یو جے کے صدر شہزادہ ذوالفقار اور سیکریٹری جنرل ناصر زیدی نے عمران خان سے صحافیوں پر غیرملکی فنڈز لینے کے دعوے پر ثبوت دینے کا مطالبہ کیا اور کہ اکہ عمران خان کا فرض ہے کہ وہ ان صحافیوں کے نام بتائیں جو ان کے دعوے کے مطابق حکومت گرانے کی سازش میں ملوث تھے۔ انہوںنے کہاکہ ان صحافیوں کے نام بتائیں جنہوں نے سازش کے لیے غیر ملکی قوتوں سے پیسے لئے۔انہوںنے کہاکہ اگر ثبوت نہیں ہیں تو عمران خان الزامات واپس لیں اور صحافی برادری سے معافی مانگیں۔ انہوںنے کہاکہ وزارت خارجہ کی کوریج کرنے والے صحافیوں کا غیر ملکی سفارت کاروں سے رابطے میں رہناپیشہ ورانہ ضرورت ہوتی ہے۔انہوںنے کہاکہ ہر ملک میں تعینات سفارت کاروں کا متعلقہ ممالک میں سفارتی عملے سے رابطے میں رہنا ذمہ داریوں کا حصہ ہوتا ہے۔ انہوںنے کہاکہ نام لئے بغیر الزامات سے پوری صحافتی برادری کی ساکھ مجروح ہوئی جو انصاف، قانون اور اصول کے خلاف ہے۔ انہوںنے کہاکہ عمران خان نے ماضی میں بھی ایک صحافی پر 35 پنکچر کا الزام لگایا تھا، بعد میں اسے سیاسی بیان قرار دے دیا ،اس سے پہلے بھی صحافیوں پر لگائے جانے والے الزامات ملکی اور غیر ملکی عدالتوں میں غلط ثابت ہو چکے ہیں۔ بیان میں کہاگیاکہ عمران خان کو اپنے مشیروں پر دھیان دینا چاہیے جو انہیں غلط حقائق بتا رہے ہیں ہیں،آج اگر پیکا قانون لاگو ہوتا تو پی ٹی آئی کے ہزاروں لوگ جیلوں میں بند ہوتے۔ مشترکہ بیان میں کہاگیاکہ جلسے جلوسوں میں پی ٹی آئی کے لوگ مرد و خواتین صحافیوں کو تشدد، بدسلوکی کا نشانہ بنا چکے ہیں،نفرت پر مبنی تقاریر اور بیانات سے صحافیوں کی زندگیوں کو خطرات لاحق ہیں،یہ ان کی پیشہ ورانہ آزادی کے منافی ہے، پی ٹی آئی اپنے اصل منشور پر عمل کرے۔
