لاس اینجلس(این این آئی) ہالی ووڈ کے معروف اداکار مارک روفیلو نے اسرائیل کے مقبوضہ مغربی کنارے اور غزہ کی پٹی میں فلسطینیوں کے ساتھ امتیازی سلوک روا رکھنے پر ڈیجیٹل ادائیگی کے پلیٹ فارم ‘پے پال ہولڈنگز’ کی شدید مذمت کی ہے۔فلسطین کے خلاف اسرائیلی جارحانہ پالیسی پر تنقید کرتے ہوئے اداکار نے ٹوئٹر پر لکھا کہ پے پال اسرائیل کی غیر قانونی بستیوں میں کام کررہا ہے لیکن غزہ اور مغربی کنارے میں فلسطینیوں کو خدمات فراہم کرنے سے انکار کر رہا ہے، یہ اقوام متحدہ کے رہنما اصولوں کی براہ راست خلاف ورزی ہے۔انہوں نے اپنے ٹویٹ میں ایک پٹیشن کا لنک بھی منسلک کیا جس میں پے پال پر زور دیا گیا کہ وہ فلسطینی علاقوں میں اپنی خدمات پیش کرے۔درخواست میں مزید کہا گیا ہے کہ غزہ میں رہنے والوں میں سے تقریباً نصف بے روزگار ہیں، جس کی وجہ سے بہت سے لوگ روزی کمانے کے لیے انٹرنیٹ کی طرف رجوع کرتے ہیں۔
