اسلام آباد(این این آئی) پاکستان تحریک انصاف کے چیئر مین عمران خان نے پارٹی ذمہ داران کو مہنگائی کے معاملے پر آواز اٹھانے کی ہدایت کی ہے ۔ منگل کو چیئرمین پاکستان تحریک انصاف عمران خان کی زیر صدارت اہم اجلاس ہوا جس میں ملک کی مجموعی سیاسی صورتحال اور مہنگائی کاجائزہ لیا گیا۔2 جولائی کو اسلام آباد میں مہنگائی جلسے کے انعقاد کے حوالے سے امور پر بھی گفتگو کی گئی ۔حکومتی اتحادیوں کی قومی اسمبلی میں تقاریر کے متن کا بھی جائزہ لیا گیا ۔چیئرمین تحریک انصاف عمران خان نے پارٹی ذمہ داران کو مہنگائی کے معاملے پر آواز اٹھانے کی ہدایت کی ۔ عمران خان نے کہاکہ چوروں نے خود کو ریلیف دینے کے لیے عوام کو بدترین مہنگائی کی اذیت ناک تکلیف میں مبتلا کر رکھا ہے۔ انہوںنے کہاکہ نکمے،نااہل،بددیانت اور بد نام گروہ نے اپنی چوری بچانے کے لئے بغیر تیاری اقتدار پر قبضے کی سازش کی۔ عمران خان نے کہاکہ 2018 میں تحریک انصاف کو اقتدار ملا تو معیشت دیوالیہ پن کے کنارے کھڑی تھی۔ عمران خان نے کہاکہ آئی ایم ایف کی کڑی شرائط،کمزور معیشت اور کرونا وباء کے باوجود تحریک انصاف کی حکومت نے عالمی مہنگائی کا بوجھ عوام پر منتقل نہیں کیا۔ انہوںنے کہاکہ امپورٹڈ کٹھ پتلیوں نے 9 ہفتوں میں مہنگائی کی صورت میں عوام سے اپنی غلامی کی قیمت وصول کی۔ عمران خان نے کہاکہ ان تجربہ کارچوروں کے زیر سایہ حال کی طرح معیشت کا مستقبل بھی تاریک ہے۔ سابق وزیر اعظم نے کہاکہ متنبہ کیا تھا نہایت محنت سے کھڑی کی گئی معیشت سیاسی عدمِ استحکام کا بوجھ برداشت نہیں کر پائے گی۔ انہوںنے کہاکہ 2 جولائی کو اسلام آباد میں عوام کے ساتھ مل کر ملک اور عوام کے خلاف شرمناک سازش پر تاریخی احتجاج کریں گے۔ سابق وزیر اعظم نے کہاکہ پاکستان کی مزید دلدل میں گرنے سے بچانے کے لئے واحد راستہ صاف شفاف انتخابات ہیں
