اسلام آباد (این این آئی) پاکستان تحریک انصاف کے رہنما اسد عمر نے کہاہے کہ جمہوریت کے لبادے میں آمریت پروان چڑھانے والی جماعتیں پوری طرح بے نقاب ہیں،نااہل، نکمے اور بددیانت سیاستدانوں کے امپورٹڈ کنسورشیم نے اپنی چوری بچانے کیلئے معیشت تباہی کے گھاٹ اتار دی ہے۔ اپنے بیان میں اسد عمر نے کہاکہ جمہوریت کے لبادے میں آمریت پروان چڑھانے والی جماعتیں پوری طرح بے نقاب ہیں،کیا ابہام باقی ہے کہ اس بے چہرہ امپورٹڈ سرکار نے عوام کو اذیت میں مبتلا کررکھا ہے۔ سابق وزیر نے کہاکہ نااہل، نکمے اور بددیانت سیاستدانوں کے امپورٹڈ کنسورشیم نے اپنی چوری بچانے کیلئے معیشت تباہی کے گھاٹ اتار دی ہے۔ اسد عمر نے کہاکہ ایک جمہوری معاشرے میں عوام کے پاس پرامن احتجاج کے ذریعے اپنی حالتِ زار کے اظہار کے علاوہ کیا راستہ ہوتا ہے۔ انہوںنے کہاکہ صحیح معنوں میں جمہوری حکومتیں پرامن احتجاج کرنے والوں پر طاقت کے استعمال کی بجائے ان کے مسائل کے حل کی تدبیر کرتی ہیں،اس سے پہلے 25 مئی کو عوام کے آئینی و جمہوری حقوق پر بزورِ قوت تاریخ کا سب سے بڑا ڈاکہ ڈالا گیا۔ اسد عمر نے کہاکہ امپورٹڈ بندوبست کے سارے کل پرزے سن لیں، اذیت ناک مہنگائی کیخلاف عوامی ردِعمل میں غیرمعمولی شدت آرہی ہے۔ انہوںنے کہاکہ پرامن احتجاج کے آئینی حق کو سلب کرکے معاشرے میں انتشار کے بیج بونے کی حکومتی کوششوں کا سنجیدگی سے جائزہ لیا جانا چاہیے ۔
