لاہور( این این آئی)اداکار مانی نے کہا ہے کہ سنسر بورڈ کی جانب سے فلم بینوں کے لئے نامناسب ہونے کے دعوے کے بعد فلم ”لفنگے ”کی پاکستان میں ریلیز پرپابندی پر رد عمل دیتے ہوئے کہا ہے کہ فلم میں ایسا کچھ نہیں ہے جو پہلے نہ دکھایا گیا ہو۔ایک انٹر ویو میں انہوںنے کہا کہ سندھ سنسربورڈ نے چند مناظر نکالنے کی درخواست کی تھی جس کی تعمیل کرتے ہوئے ان مناظرہٹا دیا گیا لیکن پنجاب سنسربورڈ نے فلم کو مکمل طور پردیکھے بغیرہی ریلیز پرپابندی عائد کردی، سنسر بورڈ والے فلم کو تقریباً 45 منٹ دیکھتے ہیں اور اس پرپابندی عائد کردیتے ہیں۔مانی نے واضح کیاکہ فلم میں ایسے لطیفے یا ذومعنی جملے شامل نہیں ہیں جو اس سے پہلے پاکستانی فلموں میں پیش نہیں کیے گئے ، پاکستان میں سیاستدان بھی اکثرایک دوسرے پر نازیبا تبصرے کردیتے ہیں جس کا مطلب ہے کہ فلم میں ایسی کوئی چیز نہیں ہے جو موجودہ معاشرتی اصولوں کے مطابق نہ ہو۔ٹریلر سنسر بورڈ کی منظوری کے بعد ہی جاری کیا گیا تھا تاہم انہوں نے اس بات پر بھی زور دیا کہ سنسر بورڈ میں انہی لوگوں کو ہونا چاہیے جنہیں کام آتا ہو اور وہ فلمی صنعت سے واقف ہوں
