پاکستان اسٹاک ایکسچینج میں ابتدائی ٹریڈنگ کے دوران تیزی کا رجحان

کراچی (این این آئی)پاکستان اسٹاک ایکسچینج میں ابتدائی ٹریڈنگ کے دوران تیزی کا رجحان دیکھا گیا، بینچ مارک کے ایس ایـ100 انڈیکس میں 617 پوائنٹس کا اضافہ ہوا۔پی ایس ایکس ویب سائٹ کے مطابق صبح تقریباً 10 بج کر 20 منٹ پر کے ایس ایـ100 انڈیکس 617 پوائنٹس یا 0.79 فیصد بڑھ کر 78 ہزار 877 پر پہنچ گیا، جو گزشتہ روز 78 ہزار 260 پر بند ہوا تھا۔یاد رہے کہ 9 اگست کو بینچ مارک کے ایس ایـ100 انڈیکس 695 پوائنٹس اضافے کے بعد 78 ہزار 569 پر پہنچا تھا۔اس سے قبل 5 اگست کو بینچ مارک کے ایس ایـ100 انڈیکس میں 1141 پوائنٹس کی تنزلی ہوئی تھی، جس کے بعد انڈیکس 77 ہزار 84 پر آگیا تھا۔31 جولائی کو بھی انڈیکس میں 741 پوائنٹس کی کمی دیکھی گئی تھی جبکہ 29 جولائی کو انڈیکس 798 پوائنٹس یا 1.02 فیصد اضافے کے بعد 78 ہزار 827 پر پہنچ گیا تھا۔19 جولائی کو آخری کاروباری روز ٹریڈنگ کے دوران شدید مندی کا رجحان دیکھا گیا، جب ایک موقع پر بینچ مارک کے ایس ایـ100 انڈیکس 1900 پوائنٹس سے زائد کم ہوا تھا، تاہم انڈیکس 1721 پوائنٹس کی تنزلی سے 80 ہزار 117 پر بند ہوا تھا۔