اسکواش چیمپئن شپ، پاکستان کے عاصم خان نے بڑا اپ سیٹ کر دیا

ورجینیا (این این آئی)شارلٹس ول اوپن اسکواش ٹورنامنٹ میں پاکستان کے عاصم خان نے بڑا اپ سیٹ کرتے ہوئے سیکنڈ سیڈ مصر کے یحییٰ النواسانی کو سنسنی خیز مقابلے میں شکست دے کر کوارٹر فائنل تک رسائی حاصل کر لی ہے۔امریکی ریاست ورجینیا میں جاری اس ٹورنامنٹ میں عاصم نے مضبوط مصری حریف کو ایک گھنٹے پر محیط سخت مقابلے کے بعد زیر کیا۔عاصم خان نے یحییٰ النواسانی کو 11ـ7، 4ـ11، 11ـ6، 7ـ11 اور 11ـ7 کے اسکور سے شکست دی، ان کی اس شاندار فتح نے انہیں ٹورنامنٹ کے کوارٹر فائنل میں پہنچا دیا ہے۔دوسری جانب پاکستان کے ایک اور کھلاڑی عشب عرفان دوسرے راؤنڈ میں سیڈ نمبر 7 مصر کے ابراہیم الکبانی سے شکست کھا گئے، ان کو 11ـ8، 11ـ7، 7ـ11 اور 11ـ7 کے اسکور سے شکست کا سامنا کرنا پڑا۔شارلٹس ول اوپن اسکواش ٹورنامنٹ کی مجموعی انعامی رقم 28750 ڈالرز ہے اور دنیا بھر کے اسکواش کھلاڑی اس ایونٹ میں شریک ہیں۔