لاہور(این این آئی)صوبائی وزیر صنعت و تجارت چوہدری شافع حسین نے ڈیوس روڈ پر نو تعمیر شدہ پیسک ہاوس کا سوموار کو دورہ کیا۔ صوبائی وزیر نے پیسک ہاوس میں مختلف شعبوں کیلئے مختص حصوں کا معائنہ کیا اور کام کے معیار کا بھی جائزہ لیا۔ ایم ڈی پنجاب سمال انڈسٹریز کارپوریشن سائرہ عمر نے صوبائی وزیر کو نو تعمیر شدہ پیسک ہاوس بارے بریفنگ دی۔ صوبائی وزیر صنعت وتجارت شافع حسین نے اس موقع پر گفتگو کرتے ہوئے کہا کہ پیسک ہاوس میں مختلف دفاتر کی منتقلی سے کرائے کی مد میں کروڑوں روپے کی بچت ہوگی۔گزشتہ دور میں نامکمل چھوڑے گئے اس منصوبے کو تیز رفتاری سے مکمل کیا گیا ہے اور منصوبے کی معیاری تکمیل کو یقینی بنایا گیا ہے۔ صوبائی وزیر نے کہا کہ پنجاب کی موجودہ حکومت صوبے بھر میں انفراسٹرکچر کے شاہکار بنا رہی ہے۔ انفراسٹرکچر کے منصوبوں کی معیاری اور بروقت تکمیل یقینی بنائی جارہی ہے۔
