لندن ( این این آئی) چیئرمین پاکستان کرکٹ بورڈ محسن نقوی نے لندن میں انگلینڈ و ویلز کرکٹ بورڈ کے چیئرمین رچرڈ تھامسن سے ملاقات کی ۔چیئرمین ای سی بی رچرڈ تھامسن نے چیمپئنز ٹرافی ٹورنامنٹ کے سلسلے میں چیئرمین محسن نقوی اور پی سی بی کے لئے نیک خواہشات کااظہار کیا ۔ چیئرمین ای سی بی نے کہا کہ انگلینڈ کا حالیہ دورہ پاکستان انتہائی شاندار رہا۔ انہوں نے کہا کہ چیمپئنز ٹرافی ٹورنامنٹ کے لئے ہماری نیک تمنائیں پاکستان کے ساتھ ہیں۔ چیئرمین پی سی بی محسن نقوی نے کہاکہ پاکستان آئی سی سی چیمپئنز ٹرافی ٹورنامنٹ کے لئے تیار ہے۔سٹیڈیمز کو جدید انداز میں اپ گریڈ کیا جا رہا ہے۔چیمپئنز ٹرافی ٹورنامنٹ کے لئے ہر سطح پر فول پروف انتظامات کیے جا رہے ہیں۔مہمان ٹیموں کو سٹیٹ گیسٹ کا پروٹوکول دیا جائے گا۔چیئرمین انگلینڈ و ویلز کرکٹ بورڈ رچرڈ تھامسن نے حالیہ دورہ کے دوران شاندار مہمانداری پر چیئرمین پی سی بی محسن نقوی کا شکریہ ادا کیا ۔
