اسلام آباد (این این آئی)وفاقی وزیرداخلہ محسن نقوی نے قومی دن پر متحدہ عرب امارات کی حکومت،سفیر اور عوام کو دل کی اتھاہ گہرائیوں سے مبارکباد دیتے ہوئے کہا ہے کہ قومی دن پر یو اے ای کے بہن بھائیوں کی خوشیوں میں برابر کے شریک ہیں۔ یو اے ای کا قومی دن پاکستان کے لئے بھی انتہائی اہمیت کا حامل ہے۔پیر کوکامتحدہ عرب امارات کے قومی دن پر اپنے پیغام میں وفاقی وزیر محسن نقوی نے کہا کہ یہ دن اس عظیم ملک کی ترقی، استحکام اور خوشحالی کی علامت ہے، متحدہ عرب امارات کی قیادت نے انتھک محنت اور عزم کے ذریعے اقوام عالم میں اپنا مقام بنایا ہے، پاکستان اور متحدہ عرب امارات کے برادرانہ تعلقات وقت گزرنے کے ساتھ مزید مستحکم ہو رہے ہیں، یو ای اے نے ہمیشہ ہر آزمائش میں پاکستان کا ساتھ دیا ہے۔ انہوں نے کہا کہ پاکستان کو یو ای اے کے ساتھ تعلقات پر فخر ہے۔ دونوں ممالک کے درمیان مضبوط تجارتی تعلقات بڑھتے روابط کا ثبوت ہیں۔ پاکستان متحدہ عرب امارات کے ساتھ دوطرفہ تعلقات کو مزید بڑھانے کے لئے پرعزم ہے۔ دعا گو ہیں کہ متحدہ عرب امارات ہمیشہ ترقی کی راہوں پر گامزن رہے۔
