لاہور( این این آئی)وزیراعلی پنجاب مریم نواز شریف نے انٹرنیشنل سول ایوی ایشن ڈے پر اپنے پیغام میں کہا ہے کہ ہوا بازی نے دنیا کو ایک گلوبل ویلیج میں بدل دیا ہے جس سے فاصلے سمٹ گئے ہیں۔ انہوں نے کہا کہ ایوی ایشن اور پی آئی اے کو ان کا کھویا ہوا مقام واپس دلوانے پر وزیر اعظم شہباز شریف کو خراج تحسین پیش کرتے ہیں،وزیر اعظم شہباز شریف کی مدبرانہ کوشوں سے پی آئی اے کو یورپ میں فلائٹ آپریشن کی اجازت ملی ۔وزیر اعلیٰ پنجاب مریم نواز شریف نے کہا کہ معیشت، سیاحت اور عوامی روابط کے فروغ کیلئے ایوی ایشن کا کردار فراموش نہیں کیا جا سکتا ،پنجاب حکومت جدید ہوائی سفری سہولیات فراہم کرنے کے لیے پرعزم ہے۔ انہوں نے کہا کہ پنجاب کی ایئر لائن کے قیام کی تجویز کا جائزہ لیا جا رہا ہے ۔
