لاہور( این این آئی)پاکستان تحریک انصاف کی سینئر رہنما مسرت جمشید چیمہ نے کہا ہے کہ بانی پی ٹی آئی کا پیغام ہے کہ ہم ڈٹے رہیں گے اوراپنا حق لے کر رہیں گے،بانی پی ٹی آئی نے کہا ہے کہ میں نے ہمت نہیں ہاری،بانی پی ٹی آئی رہا ہو کر کارکنوں کی قربانی کا صلہ دیں گے،پہلے حکومت دیدہ دلیری کا مظاہرہ کرتے ہوئے گولیاں چلانے کے بیان دے رہی تھی اور اب لاشوں کا بوجھ اٹھانے کے لیے بھی تیار نہیں۔ جمشید اقبال چیمہ اور وکلاء کے ہمراہ انسداد دہشتگردی عدالت میں پیشی کے بعد میڈیا سے گفتگو کرتے ہوئے انہوں نے کہا کہ جس طرح بانی پی ٹی آئی عمران خان عوام کے حقوق کی جنگ لڑ رہے ہیں ہم بھی ان کے شانہ بشانہ لڑتے رہیں گے ،بانی پی ٹی آئی کی اہلیہ اور بہنیںجب جب ان کی زندگی بچانے کے لئے جدوجہد کرتی ہیں تو انہیںذاتی انتقام کا نشانہ بنایا جاتا ہے ، ان کے خلاف بے بنیاد پراپیگنڈا مہم چلائی جاتی ہے ،بشری بی بی اپنی جان بھی قربان کرنے کے لئے آئی تھیں کہ اگر ملک و قوم کے لئے میری جان بھی چلی جائے تو میں پیچھے نہیں ہٹوں گی ، ساری قوم عمران خان کی فیملی کو خراج تحسین پیش کرتی ہوں ، عمران خان جیل کے اندر جبکہ ان کی فیملی جیل کے باہر تکالیف کاٹ رہے ہیں،عمران خان کی فیملی سیاست کے لئے نہیں عمران خان کی زندگی بچانے کے لئے نکلی ہے ۔انہوں نے کہاکہ ڈی چوک میں نہتے لوگوں کے ساتھ جو کچھ ہوا تاریخ میں اس کی مثال نہیں ملتی ، وہ صرف پی ٹی آئی کے کارکنان نہیں تھے بلکہ پاکستان کے شہری بھی تھے ، انسانی حقوق کی تنظیمیں اورسول سوسائٹی بھی شش و پنج کا شکار ہے ۔انہوں نے کہا کہ جیل کی صعوبتوں کے باوجود بانی پی ٹی آئی عمران خان کے ماتھے پر شکن اور زبان پر شکوہ نہیں ،ان کا پیغام ہے کہ ہم ڈٹے رہیں گے ہم نہیں جھکیں گے ،قوم کا بنیادی حق لے کر رہیں گے ۔ بانی پی ٹی آئی عمران خان آئندہ کے لئے جو لائحہ عمل دیں گے پاکستانی قوم اس پر من و عن عمل کرے گی ۔ انہوں نے کہا کہ بانی پی ٹی آئی عمران خان نے کہا ہے کہ قوم کے مستقبل کے لئے بھلے میری جان چلی جائے میں اس کے لئے تیار ہوں لیکن میں بتانا چاہتی ہوں ساری قوم عمران خان پر جان نچھاور کرنے کے لئے تیار ہے ۔انہوں نے کہا کہ ہم پر امن جماعت ہیں اور ہم نے آئین و قانون کے دائرے میں رہتے ہوئے اپنی جدوجہد کو جاری رکھنا ہے ۔
