اسلام آباد (این این آئی)وفاقی وزیر اطلاعات عطاء اللہ تارڑ نے کہا ہے کہ کسی بھی ملک کی ترقی و خوشحالی کے لئے امن و استحکام ناگزیر ہے، دنیا میں کوئی ایسا مسئلہ نہیں جو ڈائیلاگ سے حل نہ کیا جا سکے، بہت سی چیزیں بہتر کرنے کی ضرورت ہے۔انسٹیٹیوٹ آف سٹریٹجک میں منعقدہ ڈائیلاگ سے خطاب کرتے ہوئے وزیراطلاعات نے کہاکہ انسانی ثقافت اور ورثے کی تاریخ صدیوں پرانی ہے۔ وفاقی وزیر نے کہاکہ پاکستان کی ثقافت، تہذیب ہماری پہچان ہے۔ وزیراطلاعات نے کہاکہ بین المذاہب ہم آہنگی سے بہترین معاشرہ تشکیل پاتا ہے، ہم پاکستان میں سیاحت کو فروغ دینا چاہتے ہیں۔ وفاقی وزیر نے کہاکہ مختلف ممالک کے وفود پاکستان کا دورہ کر رہے ہیں جو خوش آئند ہے۔ وزیراطلاعات ونشریات نے کہاکہ پاکستان کے مثبت تشخص کو اجاگر کرنے کے لئے کام کر رہے ہیں۔انہوںنے کہاکہ ڈائیلاگ ہر مسئلہ کا حل ہیں، دنیا میں کوئی ایسا مسئلہ نہیں جو ڈائیلاگ سے حل نہ کیا جا سکے۔وفاقی وزیر اطلاعات نے کہاکہ بہت سی چیزیں بہتر کرنے کی ضرورت ہے۔ انہوںنے کہاکہ کسی بھی ملک کی ترقی و خوشحالی کے لئے امن و استحکام ناگزیر ہے۔ انہوںنے کہاکہ پاکستان ایک خوبصورت اور پرامن ملک ہے، تاریخی مقامات کے تحفظ کے لئے کام کر رہے ہیں۔ وفاقی وزیر نے کہاکہ ڈیجیٹل پورٹل کے ذریعے ان تاریخی مقامات سے متعلق معلومات حاصل کی جا سکتی ہیں۔
