ماسکو/باکو(این این آئی )آذربائیجان نے روس سے قازقستان میں طیارے کے حادثے پر معافی مانگنے کا مطالبہ کر دیا۔میڈیارپورٹس کے مطابق آذربائیجان کے رکنِ پارلیمنٹ راسم موسی بیوف نے کہا ہے کہ روس کو طیارے حادثے کی ذمے داری قبول کرنی چاہیے۔راسم موسی بیوف کا کہنا تھا کہ ذمے داروں کے خلاف قانونی کارروائی اور متاثرین کو معاوضے کا اعلان کرنا چاہیے۔دوسری جانب کریملن کے ترجمان دیمتری پیسکوف کا کہنا ہے کہ طیارے کے حادثے کی تحقیقات جاری ہیں، جب تک تحقیقات مکمل نہیں ہوتیں کسی قسم کا تبصرہ نہیں کر سکتے۔ان کا کہنا تھا کہ ہمارے پاس ایوی ایشن حکام ہیں جو تحقیقات کر سکتے ہیں، صرف روسی ایوی ایشن حکام کی معلومات قابلِ قبول ہیں۔کارپٹ پلان ایمرجنسی کی صورت میں فضائی حدود بند کرنے کا پروٹوکول ہے، تب تک طیارے میں خرابی کی اطلاع اور رخ تبدیلی کی درخواست کی جا چکی تھی۔سربراہ روسی فیڈرل ایئر ٹرانسپورٹ ایجنسی کا کہنا تھا کہ حادثے کے روز گروزنی میں پیچیدہ صورتِ حال تھی، یوکرین کے لڑاکا ڈرون گروزنی اور ویلادیکاوکاز پر حملے کر رہے تھے۔آذربائیجان ایئر لائن کا مسافر طیارہ 25 دسمبر کو قزاق شہر اکتاو میں گر کر تباہ ہو گیا تھا، یہ طیارہ آذربائیجان کے شہر باکو سے چیچنیا کے شہر گروزنی جا رہا تھا۔حادثے کا شکار ہونے والے طیارے میں عملے سمیت 67 افراد موجود تھے جن میں 39 ہلاک اور 28 افراد زخمی ہوئے تھے۔
