لاہور (این این آئی)پاکستان شو بز کی سحر انگیز خوبصورتی اور بے مثال فنکارانہ صلاحیتوں کی مالک اداکارہ نیلم منیر نے خوبصورتی بڑھانے کے مصنوعی طریقے اور سرجری کروانے پر قدرتی حسن کو ترجیح دے دی۔نیلم منیر نے حال ہی میں ایک پوڈ کاسٹ میں شرکت کی جہاں انہوں نے بڑھاپے، اینٹی ایجنگ اور کاسمیٹک پروسیجرز پر اپنے خیالات کا اظہار کیا۔اس کے بارے میں بات کرتے ہوئے نیلم منیر نے کہا کہ، خوبصورتی اوروقار عمر کے ساتھ آتے ہیں۔ آپ کو عمر بڑھنے، باریک لکیروں اور جھریوں کے بارے میں فکر کرنے کی ضرورت نہیں ہے۔ آپ اپنی قدرتی جلد میں خوبصورت نظر آتے ہیں۔ عمر آپ کی شخصیت میں نکھار ڈالتی ہے اور وقار میں اضافہ کرتی ہے۔انہوں نے مزید کہا کہ آپ خود ڈاکٹر ہیں؛ آپ اس کے بارے میں بہتر جانتی ہیں کہ بوٹوکس کروانے والے تمام چہرے ایک جیسے نظر آتے ہیں۔ کیا وہ ایک جیسے نہیں ہیں؟ میرے خیال میں فردکو اپنی شکل وصورت کے بارے میں پراعتماد ہونا چاہیے، لیکن اگر کسی کو یہ پروسیجر کروانا ہے، تو یہ اس کی اپنی پسند ہے۔نیلم منیر کے عمر اور حسن کے بارے میں میچور خیالات کو مداح پسندیدگی کی نگاہ سے دیکھ رہے ہیں اور سراہ رہے ہیں۔
