اسلام آباد (این این آئی)ترجمان پی ڈی ایم حافظ حمداللہ نے کہاہے کہ مقبوضہ جموں کشمیر پر بھارتی قبضہ انسانیت سوز بحران میں تبدیل ہوچکا ہے ،5 اگست 2019کو مودی حکومت نے مقبوضہ کشمیر کی مستقل حیثیت ختم کرکے جابرانہ اقدام کیا ۔ اپنے بیان میں حافظ حمد اللہ نے کہاکہ اور کشمیری نہتے عوام پر ظلم وستم کا ایک نیا سیاہ دور شروع کردیا گیا ،کشمیری عوام بیرونی دنیا سے کٹ کر رہ گئے آج مقبوضہ کشمیر کو جیل خانہ میں تبدیل کردیاگیا ۔انہوںنے کہاکہ بھارتی ستم کی وجہ سے مقبوضہ کشمیر بھارتی فوجی چھائونی کا منظر پیش کررہاہے ،وادی میں نہتے کشمیریوں کو خون میں نہلایا جاتاہے اور حواکی بیٹیوں کی عزت کو پائوں تلے روندا جارہاہے ۔ انہوںنے کہاکہ وہاں کے قائم کئے گئے عقوبت خانے ہٹلر کے مظالم کو شرمارہے ہیںلیکن کشمیری عوام بھارتی ناجائز قبضے کیخلاف بیرونی مدد کے بغیر جنگ لڑرہے ہیں ۔ انہوںنے کہاکہ عالمی برادری کی بھارتی مظالم اور بربریت پر مجرمانہ خاموشی افسوسناک ہے ،کشمیریوں کو اقوام متحدہ کی قراردادوں کے مطابق حق خودارادیت کیوں نہیں دی جاتی؟ ۔ انہوںنے کہاکہ پاکستان اور پاکستانی عوام کشمیریوں کے ساتھ مضبوطی سے کھڑے ہیں اور کھڑے رہئیں گے ۔
