فیصل آباد/تاندلیانوالہ( این این آئی)فیصل آباد کے علاقہ تاندلیانوالہ میں مسلح افراد نے حملہ کر کے حوالے میں بند 3 سگے بھائیوں کو قتل کردیا جبکہ ایک شخص زخمی ہو گیا۔پولیس کے مطابق 6ملزمان تھانہ کی عقبی دیوار سے سیڑھیاں لگا کر داخل ہوئے اور تمام کمروں کو باہر سے کنڈیاں لگائیں اور حوالات میں بند قیدیوں پر فائرنگ کردی۔فائرنگ سے قتل ہونے والوں میں بلال، عثمان اور ناصر شامل ہیں جبکہ زیر حراست آصف نامی ملزم زخمی ہوگیا ۔بتایاگیا ہے کہ مقتول ملزمان دوہرے قتل کیس میں زیر حراست تھے۔پولیس کی جانب سے بتایا گیا ہے کہ فائرنگ مقتول ملزمان کے مخالفین کی جانب سے کی گئی جو بعد ازاںفرار ہوگئے۔آئی جی پنجاب ڈاکٹر عثمان انور نے واقعہ کا نوٹس لے کر آر پی او فیصل آباد سے رپورٹ طلب کرلی۔ آئی جی پنجاب نے سی پی او فیصل آباد کو فائرنگ میں ملوث ملزمان کی فوری گرفتاری کا حکم دے دیا۔ترجمان پنجاب پولیس کے مطابق ایس پی انویسٹی گیشن فیصل آباد اور سی آئی اے ٹیموں نے فائرنگ میں ملوث 6 مشتبہ افراد کو حراست میں لے لیا ہے ، قتل دیرینہ دشمنی کا شاخسانہ ہے ، مقتولین پر کھرل برادری کے افراد کے قتل کا الزام تھا۔تھانہ سٹی تاندلیانوالہ پولیس نے ملزمان کو قتل اور دہشتگردی کے مقدمہ میں گرفتار کر رکھا تھا۔
