دمشق(این این آئی)شامی ڈیموکریٹک فورسز (ایس ڈی ایف)اور ترکیہ کے وفادار گروپوں کے درمیان شمال مشرقی شام میں کئی ہفتوں سے جھڑپیں جاری ہیں۔ عرب ٹی وی کے مطابق ایس ڈی ایف نے شمالی شام میں منبج کے دیہی علاقوں اور تشرین ڈیم پر کئی حملوں کا سامنا کیا اور ان کا جواب دیا ۔ جھڑپوں کے نتیجے میں دو دنوں میں 100 سے زیادہ افراد ہلاک ہو چکے ہیں۔ آبزرویٹری نے کہا کہ ترکیہ کے وفادار گروپوں کے 85 اور ایس ڈی ایف اور اس سے منسلک فوجی فارمیشنز کے 16 ارکان جاں بحق ہوئے ۔آبزرویٹری کے ڈائریکٹر رامی عبدالرحمان نے بتایا کہ جھڑپیں منبج کے جنوبی اور جنوب مشرقی دیہی علاقوں میں مرکوز ہیں۔ایس ڈی ایف نے کہا کہ ترک حمایت یافتہ فورسز نے منبج کے جنوب اور مشرق میں کئی دیہاتوں پر بڑے پیمانے پر حملہ کیا لیکن حملے کو کامیابی سے پسپا کر دیا گیا۔ اس کے برعکس ترک فوج نے دریائے فرات پر تشرین ڈیم کے اطراف کے علاقے پر توپ خانے سے بمباری کی اور حملے کے دوران ڈرون کا بھی استعمال کیا۔
