اسلام آباد (این این آئی )وزیراعظم محمد شہباز شریف نے کہا ہے کہ شہید اعتزاز حسن نے بے مثال بہادری کا مظاہرہ کر کے اپنے سکول اور ہم جماعتوں کو دہشت گرد حملے سے بچاتے ہوئے اپنی جان قربان کی ،اعتزاز کی میراث آنے والی نسلوں کے لئے مشعل راہ ہے۔پیر کو پی ایم میڈیا آفس سے جاری بیان کے مطابق وزیراعظم نے شہید اعتزاز کی برسی کے موقع پر کہا کہ آج ہم خیبرپختونخوا کے ضلع ہنگو سے تعلق رکھنے والے پاک مٹی کے فرزند شہید اعتزاز حسن کی شہادت کو یاد کرکے افسردہ ہیں جن کی غیر معمولی جر?ت ہمارے لئے امید کی کرن ہے۔ وزیراعظم نے کہا کہ صرف 15 سال کی عمر میں اعتزاز نے بے مثال بہادری کا مظاہرہ کیا اور اپنے سکول اور ہم جماعتوں کو دہشت گرد حملے سے بچاتے ہوئے اپنی جان قربان کی۔ انہوں نے کہا کہ اعتزاز کا بے لوث اور غیر متزلزل عزم ہمیں یاد دلاتا ہے کہ ہمت اور بہادری کا ایک عمل کئی زندگیوں کو بچا سکتا ہے،اعتزاز کی میراث آنے والی نسلوں کے لئے مشعل راہ ہے۔
