جدہ(این این آئی)سعودی عرب کے شہر جدہ میں حج کانفرنس و نمائش 2025کا چوتھا ایڈیشن چار دن جاری رہنے کے بعداختتام پذیر ہو گیا۔عرب میڈیاکے مطابق حج کانفرنس و نمائش کے چوتھے ایڈیشن کا آغاز جدہ سپر ڈوم میں 13جنوری کو ہوا جس کا افتتاح نائب گورنر مکہ مکرمہ ریجن شہزادہ سعود بن مشعل بن عبدالعزیز نے کیا۔نمائش و کانفرنس چار دن جاری رہی اس دوران مختلف حج مشنز سے معاہدے کیے گئے جبکہ متعدد سرکاری اداروں نے حج امور کے حوالے سے مفاہمتی یادداشتوں پربھی دستخط کیے۔کانفرنس و نمائش میں شریک مختلف ممالک سے تعلق رکھنے والوں کے خیالات معلوم کیے۔نمائش کے ہال میں موجود مشعل السبیعی نے کہاکہ موجودہ ایڈیشن سابقہ ایڈیشنز سے قطعی طورپر مختلف رہا۔ یہ بات یقینی ہے کہ انتظامیہ نے بہت محنت کی ان کی جانب سے کی جانے والی کاوشیں نمایاں ہیں۔مصر سے تعلق رکھنے والی نیرمین عبدالوھاب نے کہا کہ ہرسال اللہ کے مہمانوں کی خدمت کے لیے بہتر سے بہتر منصوبے مرتب کیے جاتے ہیں، رواں سال کانفرنس و نمائش میں جن منصوبوں کے بارے میں معلومات فراہم کی گئی ہیں انہیں دیکھ کر یقینی طور پر یہ کہا جاسکتا ہے کہ مثالی منصوبے ہیں۔نائیجیریا سے آنے والے ابوبکر محمدنے کہا کہ عازمین حج کی خدمت کیلئے سعودی عرب کی کوششیں ہمیشہ سے ہی اعلی رہی ہیں تاہم موجودہ کانفرنس و نمائش کا انعقاد مثالی ہے۔
