ممبئی(این این آئی)چاقو سے حملے میں زخمی بالی وڈ اداکار سیف علی خان کی اہلیہ و اداکارہ کرینہ کپور نے پل پل کی رپورٹنگ پر میڈیا سے اظہارِ برہمی کرتے ہوئے اپیل کی ہے کہ وہ ان کے خاندان کی پرائیوسی کا احترام کریں۔کرینہ کپور نے کسی میڈیا پورٹل کی جانب سے پوسٹ کی گئی ایک ویڈیو اپنی انسٹاگرام سٹوری پر شیئر کی، جس میں دکھایا گیا تھا کہ ان کے پچھلے گھر فارچیون ہائٹس میں انک ے بچوں (تیمور اور جیہ)کیلئے نئے کھلونے لے جائے جا رہے ہیں۔44 سالہ اداکارہ نے یہ ویڈیو شیئر کرکے برہمی کا اظہار کرتے ہوئے کہا کہ بند کریں یہ سب اب، کچھ احساس کریں، خدا کے لیے ہمیں اکیلا چھوڑ دیں ، تاہم کچھ ہی دیر بعد انہوں نے یہ پوسٹ ڈیلیٹ کر دی۔واضح رہے کہ بالی وڈ اداکار سیف علی خان، جنہیں 15 اور 16 جنوری کی درمیانی شب ممبئی کے علاقے باندرہ میں واقع انکی رہائشگاہ میں گھسنے والے شخص نے چاقو سے وار کرکے زخمی کردیا تھا، فی الحال ممبئی کے لیلاوتی ہسپتال میں زیرِعلاج ہیں۔انکی اہلیہ اداکارہ کرینہ کپور کے علاوہ سیف علی خان کی بہن سوہا علی خان، بہنوئی کنال کیمو، والدہ شرمیلا ٹیگور، بیٹی سارہ علی خان اور بیٹا ابراہیم علی خان سیف کی صحتیابی کا باقاعدگی سے جائزہ لینے کے لیے روزانہ لیلاوتی ہسپتال جارہے ہیں۔
