ریاض(این این آئی) سعودی عرب کے ولی عہد شہزادہ محمد بن سلمان نے اتوار کے روز اٹلی کی وزیر اعظم جارجیا میلونی کا استقبال کیا ہے۔عرب ٹی وی کے مطابق وہ گزشتہ رات سعودی عرب کے دورے پر پہنچی تھیں۔ انہوں نے العلا میں قائم یونیسکوکے عالمی ورثے سے متعلق آثار قدیمہ کے مرکز کا دورہ کیا۔دونوں رہنمائوں نے دو طرفہ تعلقات اور معاہدات کے بارے میں تبادلہ خیال کیا اور مختلف شعبوں میں دونوں ملکوں کے درمیان تعاون بڑھانے کے امور پر غور کیا۔ اس موقع پر علاقائی و بین الاقوامی صورتحال کے ساتھ باہمی دلچسپی کے امور بھی زیر بحث آئے۔ولی عہد اور وزیراعظم کے درمیان شام، لبنان اور اسرائیل و فلسطین کے درمیان جنگی صورت حال پر بھی تبادلہ خیال ہوا ۔ یمن، بحیرہ احمر اور ایران کے علاوہ یوکرین جنگ کے موضوعات بھی زیر بحث آئے۔دونوں ملکوں کے درمیان دفاع سے متعلق امور ، پائیدار توانائی کے شعبے میں تعاون، کھیلوں اور ثقافت کے میدان میں تعلقات کو بڑھانے پر بھی بات چیت ہوئی۔
