غزہ (این این آئی)سعودی عرب میں شاہ سلمان مرکز برائے امداد و انسانی خدمات کی جانب سے پیش کیے جانے والی طبی لوازمات پر مشتمل امدادی قافلے غزہ کی پٹی کے جنوب میں واقع ہسپتالوں اور صحت کے مراکز پہنچ گئے۔ غیرملکی خبررساں ادارے کے مطابق یہ قافلے غزہ کی پٹی میں فلسطینی عوام کے لیے جاری عوامی مہم کا حصہ ہیں۔غزہ کی پٹی میں متعلقہ سعودی مرکز نے امدادی سامان وصول کر کے مختص اداروں کی رابطہ کاری سے اس کی تقسیم شروع کر دی۔ یہ امداد ان ہسپتالوں اور صحت کے مراکز تک پہنچائی جائے گی جو موجودہ صورت حال کے نتیجے میں طبی کمک اور لوازمات کی شدید قلت کا شکار ہیں۔یہ امداد مملکت سعودی عرب کی جانب سے پیش کردہ انسانی و امدادی پروگراموں اور منصوبوں کے سلسلے کی کڑی ہے۔ یہ امداد شاہ سلمان مرکز کے ذریعے پہنچائی جا رہی ہے تا کہ مختلف بحرانات اور مصائب کے حالات میں برادر فلسطینی عوام کے شانہ بشانہ کھڑا رہا جائے۔
