ماسکو(این این آئی ) روسی صدر ولادیمیر پوتین نے سعودی ولی عہد محمد بن سلمان کو فون کیا اور امریکہ کے ساتھ مذاکرات کی میزبانی کرنے پر ان کا شکریہ ادا کیا ۔غیرملکی خبررساں ادارے کے مطابق پوتین نے کہا کہ سعودی قیادت نے بات چیت کے لیے اچھا ماحول فراہم کیا۔ فون کال کے دوران پوتین اور شہزادہ محمد بن سلمان نے تیل کی منڈیوں کے استحکام اور اوپیک پلس کے اندر تعاون کی اہمیت پر زور دیا۔ انہوں نے دونوں ملکوں کے درمیان دو طرفہ تعاون پر بھی تبادلہ خیال کیا۔روسی وزارت خارجہ کی ترجمان ماریا زاخارووا کے مطابق متعلقہ تناظر میں روس نے کہا کہ روسی،امریکی مذاکرات سابق امریکی انتظامیہ کی طرف سے پیدا کردہ عالمی مسائل کے حل کی شروعات ہیں۔ شہزادہ محمد بن سلمان کی رہنمائی میں سعودی عرب نے دنیا میں سلامتی اور امن کو بڑھانے کی سعودی کوششوں کے حصے کے طور پر دارالحکومت ریاض میں روس اور امریکہ کے درمیان مذاکرات کی میزبانی کی۔
