اسلام آباد(این این آئی)وفاقی وزیر وانائی، سردار اویس احمد خان لغاری نے پاکستان کے توانائی کے شعبے میں ڈیجیٹلائزیشن اور آٹومیشن کے حوالے سے تعاون کے امکانات کا جائزہ لینے کیلئے اوریکل کے سینئر نمائندوں سے ملاقات کی۔ اوریکل کے وفد کی قیادت مائیک بیلرڈ، وائس پریزیڈنٹ انڈسٹری اسٹریٹجی نے کی۔ملاقات میں توانائی کے شعبے کی جدید کاری اور ڈیجیٹل ٹیکنالوجی سے استفادہ حاصل کرنے پر بات چیت کی گئی تاکہ آپریشنل کارکردگی میں بہتری، شفافیت کو فروغ اور صارفین کو بہتر خدمات فراہم کی جا سکیں۔ وفاقی وزیر اویس لغاری نے انفارمیشن ٹیکنالوجی کی تیز رفتار ترقی کو اپنانے کی اہمیت پر زور دیا۔ انہوں نے کہا کہ آج دنیا میں آئی ٹی کی صالحیتیں تیزی سے بڑھ رہی ہیں اور ہمیں روایتی سسٹمز سے آگے بڑھ کر ایک منطقی، ڈیٹا پر مبنی طریقہ اختیار کرنا چاہیے۔ اوریکل جیسے عالمی ٹیکنالوجی اداروں کے ساتھ اشتراک سے ہم ایک موثر، شفاف اور صارف دوست نظام قائم کر سکیں گے۔انہوںنے کہا کہ ڈیجیٹلائزیشن کا مقصد صرف سرمایہ کاری پر واپسی کو یقینی بنانا نہیں بلکہ شفاف، احتساب میں بہتری لانا اور طویل مدتی کارکردگی کو فروغ دینا ہونا چاہیے۔اوریکل کے وفد نے حکومت پاکستان کے وڑن کا خیرمقدم کیا۔ اوریکل کی جانب سے اسمارٹ میٹرنگ، ڈیٹا انالیٹکس جیسے جدید حلوں پر تبادلہ خیال کیا گیا جو نہ صرف نظام کو بہتر بنائیں گے بلکہ صارفین کو بھی معیاری خدمات فراہم کریں گے۔ مائیک بیلرڈ نے بتایا کہ اوریکل کا برطانیہ، ترکی اور جاپان جیسے ممالک میں غیر تکنیکی نقصانات کے حل میں کافی تجربہ ہے اور پاکستان ہمارے تجربے سے فائدہ اٹھا سکتا ہے۔وزارت توانائی نے جدید، پائیدار اور صارف دوست توانائی کے شعبے کو یقینی بنانے کے لیے جدید ڈیجیٹل حل اور عالمی شراکت داری اپنانے کو اپنی اولین ترجیح قرار دیا۔
