ریاض ، نیویارک(این این آئی)امریکی کاروباری شخصیت ٹیسلا اور ایکس اے آئی کے بانی ایلون مسک نے کہا کہ وہ سٹار لنک کے استعمال کی اجازت دینے پر سعودی عرب کا شکرگزار ہیں ۔عرب ٹی کے مطابق سعودی-امریکی سرمایہ کاری فورم کے دوران مصنوعی ذہانت کے موضوعات پر تبادلہ خیال کرنے والے ایک اجلاس میں ایلون مسک نے مزید کہا کہ وہ نیویگیشن اور ہوا بازی کے مقاصد کے لیے “سٹار لنک کے استعمال کی منظوری دینے پر سعودی عرب کا شکریہ ادا کرتے ہیں۔ ایلون مسک نے مزید کہا کہ ہم خود سے چلنے والی گاڑیاں سعودی عرب لائیں گے۔انہوں نے کہا کہ ذاتی روبوٹ وہ سب کچھ کر سکتے ہیں جو آپ چاہتے ہیں۔ انہوں نے کہا کسی ایسے ایک روبوٹ کا مالک ہونا ایک خوبصورت چیز ہے۔ انہوں نے مزید کہا کہ میرا خیال ہے کہ ہم ایک بنیادی طور پر مختلف دنیا کی طرف جا رہے ہیں اور مجھے یہ بھی لگتا ہے کہ یہ ایک نئی اور دلچسپ دنیا ہے۔ مجھے لگتا ہے کہ ہر کوئی اس روبوٹ کو اپنا ذاتی معاون بنانا چاہے گا۔انہوں نے کہا یہ بہت سے معاشی امکانات کو کھولے گا کیونکہ جب ہم سوچتے ہیں کہ معیشت میں اس کے نتائج کیا ہیں تو یہ فی کس پیداواری صلاحیت کو آبادی سے ضرب دینا ہے۔انہوں نے مزید کہا کہ ایک بار جب آپ کے پاس یہ انسانی روبوٹ ہوں گے تو معاشی پیداوار بہت بڑی اور لامحدود ہو جائے گی۔ ہم موجودہ عالمی معیشت سے دس گنا بڑی معیشت حاصل کر سکتے ہیں۔انہوں نے نشاندہی کی کہ مصنوعی ذہانت میں یہ ترقی عالمی بنیادی آمدنی کی سطح میں اضافے میں معاون ہے۔ اس سے ہر کوئی اپنی مطلوبہ اشیا اور خدمات حاصل کر سکتا ہے۔ایلون مسک نے کہا کہ مصنوعی ذہانت اور ایکس اے آئی کا مقصد کائنات کو سمجھنا اور یہ سمجھنا ہے کہ اس میں کیا ہے اور ہمیں کیا کرنا چاہیے؟ انہوں نے کہا میرا فلسفہ تجسس اور کائنات کی نوعیت کو سمجھنے کی محبت پر مبنی ہے۔
