اسلام آباد (این این آئی)وفاقی وزیر تجارت جام کمال خان نے اسلام آباد کے مقامی ہوٹل میں منعقدہ جغرافیائی شناخت (جی آئی) سے متعلق قومی آگاہی کانفرنس سے خطاب کرتے ہوئے پاکستان کے جغرافیائی شناختی نظام (GI Regime) کے فروغ کے لیے عزم کا اعادہ کیا۔ اس کانفرنس کا اہتمام وزارت تجارت نے اقوام متحدہ کے ادارہ برائے خوراک و زراعت (FAO) کے اشتراک سے کیا۔اپنے کلیدی خطاب میں وزیر تجارت نے کہا کہ جغرافیائی شناخت صرف دانشورانہ املاک کا تحفظ نہیں بلکہ ثقافتی ورثے کی حفاظت، دیہی ترقی اور برآمدات کے نئے مواقع پیدا کرنے کا مؤثر ذریعہ ہے۔ انہوںنے کہاکہ ہم ایک ایسے نازک موڑ پر کھڑے ہیں جہاں پاکستان عالمی منڈیوں میں صرف ایک برآمدی ملک نہیں بلکہ معیار اور ورثے کا محافظ بن کر ابھر سکتا ہے۔انہوں نے بتایا کہ اب تک پاکستان کی 20 مصنوعات کو جغرافیائی شناخت کے تحت رجسٹرڈ کیا جا چکا ہے جن میں باسمتی چاول، چلغوزہ، سندھڑی آم، اور ملتان کی نیلی مٹی کی مصنوعات شامل ہیں۔ اس کے علاوہ یورپی یونین سمیت دیگر اہم عالمی منڈیوں میں ان مصنوعات کے بین الاقوامی تحفظ کے لیے درخواستیں بھی دی گئی ہیں۔ وزیر تجارت نے زور دیا کہ مصنوعات کی وضاحت، سرٹیفکیشن، برانڈنگ اور ٹریس ایبیلٹی کے ذریعے مکمل ویلیو چین تشکیل دینا وقت کی اہم ضرورت ہے تاکہ مقامی پیدا کنندگان کو خاطر خواہ معاشی فائدہ پہنچایا جا سکے۔کانفرنس میں وفاقی و صوبائی حکومتوں، ترقیاتی شراکت داروں، مصنوعات کی رجسٹریشن کرانے والے افراد، چیمبرز آف کامرس، ماہرین قانون، جامعات، اور نجی شعبے کے صارفین سمیت مختلف شعبہ جات سے تعلق رکھنے والے شرکاء نے شرکت کی۔ اس پلیٹ فارم کا مقصد جی آئی کے ذریعے قومی ترقی اور اقوام متحدہ کے پائیدار ترقیاتی اہداف (SDGs) کو فروغ دینا، ادارہ جاتی ہم آہنگی بہتر بنانا، اور جغرافیائی شناخت کے نظام کو وسعت دینے کے لیے حکمت عملی کی تیاری تھا۔وزیر تجارت نے یہ بھی بتایا کہ پاکستان میں 200 سے زائد مصنوعات کو ممکنہ جغرافیائی شناختی مصنوعات کے طور پر شناخت کیا جا چکا ہے۔ انہوں نے FAO کی جانب سے TRI-Chilgozaپروجیکٹ کے تحت فراہم کردہ تکنیکی تعاون کو سراہا، جس کے تحت گلگت بلتستان، شمالی و جنوبی وزیرستان، شیرانی (بلوچستان) اور چترال میں چلغوزے کو ممکنہ جی آئی کے طور پر شناخت کیا گیا ہے۔
