اسلام آباد(این این آئی) وفاقی وزیر شیری رحمن نے پاکستان تحریک انصاف کے رہنما شوکت ترین کی خیبر پختونخوا اور پنجاب کے وزرائے خزانہ سے گفتگو پر سخت تشویش کا اظہا رکرتے ہوئے کہاہے کہ آڈیو سن کر سکتے میں چلی گئی ، آئی ایم ایف پروگرام منسوخ ہوگا تو تمام چیزیںنیچے تک منتقل ہو نگی ۔اپنے بیان میں پاکستان پیپلز پارٹی کی رہنما شیری رحمن نے کہا کہ میں یہ آڈیو سن کر سکتے میں چلی گئی، ایسے وقت میں جب پاکستان کی ریاست ایک نازک وقت سے گزر رہی ہے اور عوام مشکل وقت سے گزررہے ہیں، اگر ایسے میں آئی ایف پروگرام منسوخ ہو گا تو صرف حکومت کو مسئلہ نہیں ہو گا بلکہ تمام چیزیں نیچے تک منتقل ہوں گی۔انہوں نے کہا کہ یہ اپنی سیاسی برتری کیلئے یہ سیاست کر رہے ہیں، ریاست کو ڈبونے کے لیے تیار ہیں، سوشل میڈیا پر ان کے لوگ طوفان برپا کرتے ہیں لیکن بڑے بڑے عہدوں اور حکومت میں رہنے والے ذمے دار اہلکاروں کی سوچ بھی انتہائی افسوسناک ہے، ہم نے بدترین کالے دور میں بھی پاکستان کے خلاف کبھی بات نہیں کی۔انہوںنے کہاکہ ہماری ہمیشہ سے ترجیح رہی ہے کہ ملک میں چاہے کتنی ہی تنقید کر لیں تاہم مجموعی طور پر ریاست پاکستان اور ملک کو کبھی ٹھیس نہ پہنچائیں تاہم یہ ان کی نئی طرز سیاست ہے، کسی کو بھی اپنی ساکھ بچانے کے لیے اس وقت ملک گرانے اور عوام کو مشکل میں ڈالنے کی کوشش نہیں کرنی چاہیے۔
