اسلام آباد (این این آئی)پاکستان نے سنکیانگ میں انسانی حقوق پر ہائی کمشنر برائے انسانی حقوق کے دفتر کی رپورٹ کے اجراء کا نوٹس لیا ہے۔ ترجمان دفتر خارجہ عاصم افتخار احمد نے اپنے بیان میں کہاکہ اقوام متحدہ کے ایک ذمہ دار رکن کی حیثیت سے کثیر الجہتی عزم کے ساتھ پاکستان اقوام متحدہ کے چارٹر کے اصولوں پر یقین رکھتا ہے،ان اصولوں میں سیاسی آزادی، خودمختاری اور ریاستوں کے اندرونی معاملات میں عدم مداخلت کا احترام شامل ہے۔عاصم افتخار احمد نے کہاکہ ہمارا مستقل موقف ہے کہ انسانی حقوق کے عالمی احترام کے فروغ کے لیے غیر سیاسی کاری، عالمگیریت، معروضیت، مکالمہ اور تعمیری انگیجمنٹس اہم ہتھیار ہونا چاہیے۔ انہوںنے کہاکہ پاکستان سنکیانگ میں سماجی و اقتصادی ترقی، ہم آہنگی اور امن و استحکام کے لیے چین کی کوششوں کی حمایت کرتا ہے۔ انہوںنے کہاکہ چین نے پچھلے 35 سالوں میں 700 ملین سے زیادہ لوگوں کو غربت سے نکالنے میں کامیابی حاصل کی ہے، اس طرح ان کے حالات زندگی میں بہتری آئی ہے اور بنیادی انسانی حقوق سے لطف اندوز ہوئے ہیں۔ ترجمان دفترخارجہ نے بتایاکہ ہم اقوام متحدہ کے انسانی حقوق کے نظام کے ساتھ ساتھ او آئی سی جنرل سیکرٹریٹ کے ساتھ چین کی تعمیری مصروفیات کو سراہتے ہیں۔ ترجمان دفتر خارجہ نے کہاکہ انسانی حقوق کے سابق ہائی کمشنر اور او آئی سی کے وفد کے چین کے دورے بھی س کے عکاس ہیں۔ ترجمان دفتر خارجہ نے کہاکہ پاکستان اقوام متحدہ کے چارٹراصولوں کے مطابق تمام انسانی حقوق کو عالمی سطح پر آگے بڑھانے کے پختہ عزم کا اعادہ کرتا ہے۔
