اسلام آباد (این این آئی)وفاقی وزیر صحت عبدالقادر پٹیل کی خصوصی ہدایت پر سیلاب سے متاثرہ علاقوں میں ہیلتھ کیمپس لگانے کا سلسلہ منگل کو بھی جاری رہا ۔اپنے بیان میں انہوں نے کہا کہ ہیلتھ کیمپس قومی و صوبائی پولیو ایمرجنسی آپریشنز سنٹرز اور آ غا خان ہسپتال کے اشتراک سے لگائے جارہے ہیں۔انہوں نے کہا کہ سیلاب زدہ علاقوں میں 25 ہیلتھ کیمپس میں طبی امداد دی جارہی ہے ۔انہوں نے کہا کہ خیبرپختونخوا میں 16، پنجاب میں 4 اور سندھ میں 5 ہیلتھ کیمپس میں طبی امداد فراہم کی جارہی ہیں۔ وفاقی وزیر صحت نے کہا کہ ہیلتھ کیمپس میں صحت کی بنیادی سہولیات فراہم کی جارہی ہے۔انہوں نے کہا کہ کیمپس میں ادویات اور بچوں کی ویکسی نیشن کو یقینی بنا رہے ہیں عبدالقادر پٹیل نے کہا کہ جلد کے امراض، آ نکھوں کے انفیکشن، اینٹی ڈائریا کی ادویات بھی فراہم کی جارہی ہیں۔انہوں نے کہا کہ وزارت صحت صوبائی حکومت کے ساتھ ملکر سیلاب متاثرین کو طبی سہولیات کی فراہمی کو یقینی بنانے کیلئے پر عزم ہے۔
