اسلام آباد (این این آئی) وفاقی وزیر احسن اقبال نے ہدایت کی ہے کہ نارووال سپورٹس سٹی منصوبہ چھ ماہ میں مکمل کیا جائے ، منصوبے پر تاخیر کی وجہ سے کنٹریکٹر کلیمز اور قیمتوں میں اضافے کی وجہ سے 2.2 ارب روپے کی اضافی لاگت آئیگی،2.2 ارب کی اضافی لاگت کا کون ذمہ دار ہے؟ ،عمران نیازی اور سابق چیئرمین نیب جاوید اقبال سے وصول کیا جانا چاہیے۔وزارت منصوبہ بندی و ترقی میں نارووال سپورٹس سٹی منصوبہ کا جائزہ اجلاس وفاقی وزیر احسن اقبال کی زیر صدارت ہوا جس میں وزارت بین الصوبائی رابطہ، سپورٹس بورڈ اور کنسلٹنٹس نے شرکت کی ۔ وفاقی وزیر نے کہاکہ منصوبہ کی کل لاگت 2.9ارب روپے تھی مئی 2018 تک 2.2 ارب خرچ ہو چکے تھے۔ وفاقی وزیر نے کہاکہ نیب کیس کی وجہ سے منصوبہ پہ 2018 سے کام روک دیا گیا۔ انہوںنے کہاکہ نیسپاک نے رپورٹ پیش کی کہ بقایا 78 کروڑ روپے کی بجائے منصوبے کو مکمل کرنے کے لئے اب 2.9 ارب روپے درکار ہونگے۔ وفاقی وزیر نے کہاکہ منصوبے پر تاخیر کی وجہ سے کنٹریکٹر کلیمز اور قیمتوں میں اضافے کی وجہ سے 2.2 ارب روپے کی اضافی لاگت آئیگی۔وفاقی وزیر نے کہاکہ 2.2 ارب کی اضافی لاگت کا کون ذمہ دار ہے؟ ،عمران نیازی اور سابق چیئرمین نیب جاوید اقبال سے وصول کیا جانا چاہیے ۔ انہوںنے کہاکہ منصوبہ کو سیاسی انتقامی کاروائی کا نشانہ بنا کر ملک کا اربوں روپے کے نقصان کا کروایا گیا۔وفاقی وزیر نے کہاکہ منصوبے کو چھ ماہ میں مکمل کیا جائے،نوجوانوں میں کھیلوں کے فروغ کے لئے ملک میں ایسے درجنوں منصوبے بنائیں گے۔
