اسلام آباد(این این آئی) صدر مملکت ڈاکٹر عارف علوی نے کہا ہے ملک کی حفاظت میں جان کی قربانی پیش کرنے والے شہداکو خراج عقیدت پیش کرتے ہیں۔ ایوان صدر کے پریس ونگ کے مطابق ان خیالات کا اظہار انہوں نے جمعہ کو شہداکے اہل خانہ سے گفتگو کرتے ہوئے کیا۔ صدر مملکت نے ہرنائی بلوچستان میں ہیلی کاپٹر حادثے میں شہید ہونے والے میجر منیب افضل کے والد اور میجر خرم شہزاد کے بھائی سے تعزیت کی۔ صدر مملکت نے حادثے میں شہید ہونے والے صوبیدار عبدالواحد، نائیک جلیل انجم، سپاہی محمد عمران اور سپاہی شعیب خان کے اہل خانہ سے بھی بات کی۔ ڈاکٹر عارف علوی نے شمالی وزیرستان میں حملے میں شہید ہونے والے صوبیدار جاوید اقبال اور نائیک حسین احمد کے لواحقین سے بھی تعزیت کی۔ صدر نے جنوبی وزیرستان میں فائرنگ سے شہید ہونے والے نائیک عبد الرشید اور سپاہی رسول بادشاہ کے اہل خانہ سے گفتگو کی اور کہا کہ ملک کی حفاظت میں جان کی قربانی پیش کرنے والے شہدا کو خراج عقیدت پیش کرتے ہیں۔ صدر مملکت نے شہداکی بلندی درجات اور اہلِ خانہ کیلئے صبر جمیل کی دعا کی۔
