اسلام آباد (این این آئی)اسپیکر قومی اسمبلی راجہ پرویز اشرف سے وفاقی وزیر برائے توانائی خرم دستگیر نے ملاقات کی جس میں ملک کی مجموعی معاشی و سیاسی صورتحال اور گوجر خان میں عوام کو توانائی کے حوالے سے درپیش مسائل پر تبادلہ خیال کیا گیا ۔ اسپیکر قومی اسمبلی نے کہاکہ پارلیمان عوام کا نمائندہ ادارہ ہے اور عوام کو پارلیمان سے بہت زیادہ توقعات وابستہ ہیں۔ انہوںنے کہاکہ پارلیمان عوام کو درپیش مسائل کے حل کے لیے موثر قانون سازی کر رہی ہے، موجودہ حکومت کی بہتر معاشی پالیسیوں سے ملکی معیشت مستحکم ہوئی ہے۔ اسپیکر نے وزارت توانائی کی جانب سے ملک سے لوڈ شیڈنگ کے خاتمے اور سیلاب متاثرہ علاقوں میں بجلی کے انفراسٹرکچر کی بحالی کے لیے اٹھائے گئے اقدامات پر اظہار اطمینان کیا ۔ انہوںنے کہاکہ گوجر خان اور اس سے ملحقہ علاقوں کی عوام کو بجلی کے حوالے سے درپیش مسائل کو حل کیا جائے اور بجلی کی بلا تعطل فراہمی یقینی بنانے کے لیے اقدامات اٹھائے جائیں۔اسپیکر قومی اسمبلی نے بجلی کے بلوں میں ریلیف فراہم کرنے کے لیے شمسی توانائی اور توانائی کے دیگر قابل تجدید ذرائع سے بجلی حاصل کو ترجیح دینے کی ضرورت پر زور دیا ۔ اسپیکر قومی اسمبلی نے کہاکہ ملک میں توانائی بحران اور دیگر مسائل پر قابو پانے کے لیے ملکر کام کرنے کی ضرورت ہے۔وفاقی وزیر توانائی نے کہاکہ موجود حکومت عوام کو بجلی کی مد میں ریلیف فراہم کرنے کے لیے اہم اقدامات اٹھا رہی ہے۔ خرم دستگیر خان نے کہاکہ وزیراعظم محمد شہباز شریف کی ہدایت پر بجلی کی مد میں عوام کو 55 ارب روپے کا ریلیف فراہم کیا جا چکا ہے۔ انہوںنے کہاکہ حالیہ سیلاب کے دوران بجلی کا انفراسٹرکچر بڑی طرح متاثر ہوا، سیلاب زدہ علاقوں میں متاثرین کو بجلی کی مد میں 10 ارب روپے کا ریلیف دیا جا رہا ہے۔وفاقی وزیر نے اسپیکر کو گوجر خان میں بجلی کے حوالے سے عوام درپیش مسائل کو ترجیح بنیادوں پر حل کرنے کی یقین دہانی کرئی
