لاہور ( این این آئی) سابق وزیر داخلہ شیخ رشید نے کہا ہے کہ عمران خان آئندہ ہفتے لانگ مارچ کی کال دے سکتے ہیں ، چوروں کے کیسز کے پیچھے بڑے چہرے اور دستانے پہنے ہوئے ہاتھ ہیں جوڈیل اورڈھیل کروا رہے ہیں۔انہوں نے ٹوئٹر پر جاری اپنے بیان میں کہا کہ میں نے عمران خان کو کہا ہے کہ آر کرو یا پار،اب یا کبھی نہیں اور دیر نہ کرو۔پوری امید ہے کہ اس اتوار کے بعد عمران خان لانگ مارچ کی کال دے گا۔انہوں نے کہا کہ جب انصاف مرجاتا ہے تو انتقام جنم پاتاہے ،آل شریف نے انصاف کو نیلام گھر میں سجا دیا ہے۔حکومت نے اپنے کیسز ختم کراکے اپنی سیاسی قبرکھودی ہے۔چوروں کے کیسز کے پیچھے بڑے چہرے اوردستانے پہنے ہوئے ہاتھ ہیں جوڈیل اورڈھیل کروا رہے ہیں۔شیخ رشید نے کہا کہ بڑا ڈاکو ہی بڑاحکمران ہے انصاف اورقانون غریب کے لئے ہے۔پاکستان میں آل شریف کی منی لانڈرنگ کے آگے انصاف بھی شرمندہ ہے شریف خاندان کے کنفرم کیسزمیں بریت کی وجہ سے عمران خان کی کال کوایندھن ملے گا۔
