استنبول (این این آئی)وفاقی وزیر اطلاعات مریم اورنگزیب سے او آئی سی وزراء اطلاعات کانفرنس کے موقع پر ایران کے وزیر ثقافت محمد مہدی اسماعیلی نے ملاقات کی جس میں دونوں ممالک کے درمیان اقتصادی، تجارتی، ثقافتی اور عوام کی سطح پر روابط سمیت مختلف شعبوں میں دوطرفہ تعاون کو مزید مستحکم اور وسیع کرنے پر اتفاق کیا گیا ۔ وفاقی وزیر نے کہاکہ پاکستان اور ایران کے درمیان تاریخی اور برادرانہ تعلقات ہیں، دونوں ممالک کے عوام ایک دوسرے سے ثقافتی اور مذہبی رشتے سے جڑے ہوئے ہیں۔ وفاقی وزیر نے کہاکہ پاکستان ایران کے ساتھ فلم اور ڈرامہ کے شعبوں میں تعاون کو فروغ دینا چاہتا ہے، ایرانی وزیر ثقافت نے وفاقی وزیر اطلاعات کو ایران میں منعقد ہونے والے فلم فیسٹیول میں شرکت کی دعوت دی۔ وفاقی وزیر نے کہاکہ ایران کے فلم فیسٹیول میں پاکستانی فلمیں نمائش کے لئے پیش کی جائیں گی۔ وفاقی وزیر نے کہاکہ ایران کے فلم ساز پاکستان میں فلم انڈسٹری کیلئے حکومت کی جانب سے دی گئی مراعات سے مستفید ہو سکتے ہیں، حکومت پاکستان نے 2022 کے بجٹ میں فلم انڈسٹری، ثقافت اور سیاحت کے شعبہ پر ٹیکس ختم کر دیا ہے۔وزیر اطلاعات نے کہاکہ غیر ملکی فلم سازوں کو مقامی سطح پر فلم اور ڈرامہ کے مشترکہ منصوبوں میں ری بیٹ دیا جا رہا ہے۔ وفاقی وزیر اطلاعات نے پاکستان میں تباہ کن سیلاب کے تناظر میں پاکستانی قوم کے ساتھ یکجہتی اور حمایت پر ایران کا شکریہ ادا کیا۔ملاقات میں دونوں ممالک کے اطلاعات اور ثقافت کے شعبوں میں تعاون کو فروغ اور وفود کے تبادلوں پر اتفاق کیا گیا ۔ ایرانی وزیر ثقافت نے کہاکہ پاکستان کے ساتھ اطلاعات اور فن و ثقافت کے شعبوں میں تعاون کو مزید مضبوط بنائیں گے۔
