اسلام آباد(این این آئی)وزیراعظم عمران خان نے نیشنل یوتھ کونسل قائم کرنے کا فیصلہ کرلیا ۔وفاقی وزیر اسد عمر نے ملک بھر کے نوجوانوں کے نام اپنے پیغام میں کہاکہ نوجوانوں کو خوشخبری دینا چاہتا ہوں، وزیراعظم عمران خان نے ساری جدوجہد نوجوانوں کے بہتر مستقبل کیلئے کی ہے۔ انہوںنے کہاکہ وزیراعظم نے نیشنل یوتھ کونسل قائم کرنے کا فیصلہ کیا ہے، اسد عمر نے کہاکہ یوتھ کونسل کی سربراہی وزیراعظم عمران خان خود کریں گے۔ انہوںنے کہاکہ ملک بھر سے 50 نوجوانوں کا انتخاب کیا جائیگا، نوجوان وزیراعظم کے ساتھ مل کر وہ پالیسیاں تشکیل دیں گے جو ان کی ضرورت ہے، پاکستان بننے اور عمران خان کی جدوجہد میں نوجوانوں نے اہم کردار ادا کیا ہے۔ وفاقی وزیر نے کہاکہ یوتھ کونسل کا سلیکشن پراسس انتہائی شفاف اور میرٹ کی بنیاد پر کیا جا رہا ہے، نوجوان کامیاب جوان کی ویب سائیٹ سے اپلائی کریں۔ وفاقی وزیر نے کہاکہ 50 بہترین قابل نوجوانوں کو کونسل رکنیت کیلئے منتخب کیا جائیگا۔
