لاہور ( این این آئی) ترجمان وزیر اعلیٰ پنجاب فیاض الحسن چوہان نے کہا ہے کہ جعلساز عمر فاروق اظہر کا عمران خان سے بالواسطہ یا بلا واسطہ کوئی تعلق نہیں،عمران خان کو بدنام کرنے والا منجن مزید بکنے والا نہیں، عوام سب جانتی ہے۔ انہوں نے اپنے جاری کردہ بیان میں کہا کہ گھڑی خریدار عمر فاروق اظہر ایک جھوٹا، جعلساز اور مجرم شخص ہے ، ایک بار پھر بین الاقوامی دو نمبری کے ساتھ اس بندے کو لانچ کیا گیا ، عمر فاروق اظہر کا عمران خان سے بالواسطہ یا بلا واسطہ کوئی تعلق نہیں ،یہ شخص ایک سے زائد ممالک میں دھوکا دہی اور بچوں کی تحویل کے مقدمات میں مطلوب ہے۔ فیاض الحسن چوہان نے کہا کہ عمران خان کو بدنام کرنے والا منجن مزید بکنے والا نہیں، عوام سب جانتی ہے، عمران خان نے توشہ خانہ سے قانون کے مطابق گھڑی خریدی، یہ گھڑی ٹیکس ریٹرن اور الیکشن کمیشن کے گوشواروں میں ظاہر ہے۔ انہوں نے کہا کہ جعلی حکمران آئے دن ایک نئی کہانی گھڑ کر خود کو پارسا سمجھتے ہیں۔ اربوں روپے کی کرپشن کرنے والے کس منہ سے عمران خان پر الزام لگاتے ہیں؟۔
