اسلام آباد (این این آئی)اسپیکر قومی اسمبلی راجہ پرویز اشرف سے آسٹریلوی ہائی کمشنر نیل ہاکنز نے ملاقات کی جس میں دوطرفہ تعلقات سمیت باہمی دلچسپی کے دیگر پر تبادلہ خیال کیا گیا ۔ اسپیکر قومی اسمبلی نے کہاکہ پاکستان آسٹریلیا کے ساتھ دوستانہ تعلقات کو قدر کی نگاہ سے دیکھتا ہے، دونوں ممالک کے مابین پارلیمانی رابطوں اور اقتصادی تعاون میں مزید اضافہ ضروری ہے، پاکـاسٹریلیا پارلیمانی دوستی گروپ پارلیمانی سفارت کاری میں اہم کردار ادا کر رہا۔ راجہ پرویز اشرف نے کہاکہ پارلیمانی روابط اور اقتصادی تعاون کو بڑھانا دونوں ممالک کے لیے فائدہ مند ہو گا۔ راجہ پرویز اشر ف نے کہاکہ دونوں ممالک کی کاروباری برادری کے درمیان رابطوں کا فروغ ضروری ہے، پاکستانی قوم موجودہ چیلنجز سے نکلنے کے لیے پر عزم ہے۔اسپیکر نے پاکستان میں سیلاب متاثرین کے لیے مدد اور بحالی کے لیے آسٹریلوی حکومت کے تعاون کو سراہا۔ انہوںنے کہاکہ پاکستانی عوام اور حکومت بڑھتی ہوئی دہشتگردی کے خاتمے کے لیے پر عزم ہے۔ راجہ پرویز اشرف نے کہاکہ پاکستانی قوم موجودہ اقتصادی چیلنجز پر قابو پانے میں کامیاب ہو گی، پاکستان حالیہ سیلاب کے شدید اثرات سے نبرد آزما ہے۔ آسٹریلوی ہائی کمشنر نے کہاکہ آسٹریلیا پاکستان کو اپنا بااعتماد دوست اور اہم اقتصادی شراکت دار سمجھتا ہے، آسٹریلوی سرمایہ کار پاکستان میں سرمایہ کاری کے خواہشمند ہیں۔آسٹریلوی ہائی کمشنر نے افغان مہاجرین کو پاکستان میں حکومت اور عوام کے فراخدلانہ تعاون کو سراہا۔ آسٹریلوی ہائی کمشنر نے کہاکہ پاکستان میں افغان مہاجرین کو صحت اور تعلیم جیسی بنیادی سہولیات فراہم کرنا خوش آئند اقدام ہے۔ آسٹریلوی ہائی کمشنر نے دہشتگردی کے خاتمے اور فوڈ سیکیورٹی کے چیلنجز سے نمٹنے کے لیے آسٹریلوی حکومت کی جانب سے پاکستانی حکومت کے ساتھ عزم کا اعادہ کیا۔
