اسلام آباد/کراچی(این این آئی)وفاقی وزیر دفاع خواجہ آصف نے کہاہے کہ آفس ٹائم صبح 8بجے سے شام4بجے تک ہونا چاہیے۔گزشتہ روز وزیرِ اعلی سندھ مرا د علی شاہ سے وزیر دفاع خواجہ آصف نے وفاقی وفد کیساتھ ملاقات کی ،وفد میں وزیر مملکت مصدق ملک، وفاقی وزیر برائے ہائوسنگ اینڈ ورکس عبدالواسع شامل ہیں۔اس موقع پر خواجہ آصف نے کہا کہ ملک میں سورج کی روشنی سے زیادہ فائدہ اٹھایا جائے تو توانائی کی بچت ہو سکتی ہے، توانائی کا تحفظ موجودہ معاشی حالات کی بہتری کیلئے بہت ضروری ہے۔وزیرِ اعلی سندھ مراد علی شاہ نے کہاکہ شادی ہال، مارکیٹس کی تنظیموں سے بات کرنے کی ضرورت ہے، ریسٹورنٹس کو رات10بجے بند کرنے کی تجویز ہے۔مراد علی شاہ نے کہاکہ یہ ہمارا ملک ہے اسے معاشی بحران سے نکالنے کیلئے سب کو مل کر کام کرنا ہو گا۔وزیر مملکت مصدق ملک نے کہا کہ ہمیں پیٹرول درآمد کا بل کم کرنا ہے جو روز بروز بڑھ رہا ہے۔
