اسلام آباد (این این آئی) وفاقی وزیر داخلہ رانا ثنا ء اللہ نے کہاہے کہ بارود سے بھری گاڑی راولپنڈی سے اسلام آباد میں داخل ہوئی جس میں ایک مرد اور خاتون دہشت گرد سوار تھے۔ اپنے بیان میں وزیر داخلہ نے کہاکہ جمعہ کو صبح بارود سے بھری گاڑی راولپنڈی سے اسلام آباد میں داخل ہوئی جس میں ایک مرد اور خاتون دہشت گرد سوار تھے۔ انہوںنے کہاکہ بارود سے بھری یہ گاڑی آئی جے پرنسپل روڈ راولپنڈی سے اسلام آباد میں داخل ہوئی ،بارود سے بھری گاڑی اسلام آباد میں ہائی ویلیو ٹارگٹ کو نشانہ بنانے کے لئے روانہ کی گئی تھی ۔ انہوںنے کہاکہ ایگل اسکواڈ نے دوران گشت مشکوک سمجھتے ہوئے اس گاڑی کو روکا،اسی دوران گاڑی میں دھماکہ ہو گیا جس میں ایک پولیس اہلکار شہید اور 6 زخمی ہوگئے۔ انہوںنے کہاکہ پولیس کی فرض شناسی سے اسلام آباد بڑے حادثے سے محفوظ رہا،فرض شناسی پر اسلام آباد پولیس کو خراج تحسین پیش کرتا ہوں،شہید عدیل حسین کو شہدا پیکج دیا جائے گا۔وزیر داخلہ نے شہید کے اہل خانہ سے ہمدردی کا اظہار کرتے ہوئے زخمیوں کی جلد صحت یابی کی دعا کی ۔
