اسلام آباد (این این آئی)وفاقی وزیر اطلاعات مریم اورنگزیب اور وفاقی وزیر خرم دستگیر نے پاکستان ٹیلی ویژن کے ورچوئل اسٹوڈیو کا افتتاح کر دیا۔ اس موقع پر گفتگو کرتے ہوئے وزیر اطلاعات ونشریات نے کہاکہ جدید ٹیکنالوجی کے دور میں پاکستان ٹیلی ویژن کا سب سے بڑا ورچوئل اسٹوڈیو ٹیکنالوجی کا گیپ دور کرنے میں معاون ثابت ہوگا۔ انہوں نے کہاکہ پاکستان ٹیلی ویژن کے پاس تمام اثاثے موجود ہیں صرف انہیں بہترین طریقے سے استعمال کرنے کی ضرورت ہے۔ انہوںنے کہاکہ پی ٹی وی کے عملے اور انتظامیہ کی کاوشوں سے پی ٹی وی میں آئی ٹی کے حامل سلوشنز استعمال ہو رہے ہیں جو جدید دور کا تقاضا ہے۔ انہوںنے کہاکہ ورچوئل اسٹوڈیو کا قیام پاکستان ٹیلی ویڑن کا ایک اور سنگ میل ہے، اسے پاکستان کے سب سے بڑے ورچوئل اسٹوڈیو ہونے کا اعزاز حاصل ہے۔ انہوںنے کہاکہ پی ٹی وی نیوز درست خبروں کے ساتھ اب جدید انداز میں کام کرے گا۔ انہوںنے کہاکہ پاکستان ٹیلی ویژن کا اسٹیٹ آف دی آرٹ ورچوئل سیٹ قومی علاقائی اور عالمی خبروں کے ساتھ ساتھ موسم اور کھیلوں کی خبروں اور حالات حاضرہ کے پروگراموں کو بھی جدید انداز میں عوام کے سامنے پیش کرے گا۔ انہوںنے کہاکہ پاکستان ٹیلی ویژن نے اپنے 58 سالہ سفر کے دوران ترقی کی کئی منازل طے کی ہیں۔ انہوںنے کہاکہ پاکستان ٹیلی ویژن نیوز اپنے سب سے بڑے ورچوئل اسٹوڈیو کے ساتھ اب عوام کو جدید انداز میں خبریں، تجزیئے اور پاکستان کے حقیقی نکتہ نظر سے باخبر رکھے گا۔ انہوںنے کہاکہ ورچوئل اسٹوڈیو کے قیام سے قومی، علاقائی خبریں، سیاست، ثقافت، تعلیم، حالات حاضرہ اور عالمی امور کے حوالے سے پی ٹی وی نیوز کے ناظرین جدید انداز میں آگاہ ہو سکیں گے،اس اسٹوڈیوز کے ذریعے موسم کی خبروں کے ساتھ ساتھ کھیلوں کے میدان میں بھی ناظرین کو آگاہ رکھا جائے گا۔ انہوںنے کہاکہ بہترین آڈیوز، ہائی ڈیفینیشن ویڈیوز، خوبصورت گرافکس اور پی ٹی وی نیوز کی سکرین کا حصہ ہوں گی۔ورچوئل اسٹوڈیوز کے افتتاح کے موقع پر سیکرٹری اطلاعات شاہیرہ شاہد، ایم ڈی پی ٹی وی سہیل علی خان اور چیئرمین پیمرا سلیم بیگ بھی موجود تھے
