لاہور( این این آئی) پیپلز پارٹی کے پنجاب اسمبلی میں پارلیمانی لیڈر سید حسن مرتضیٰ نے سابق گورنر پنجاب چوہدری سرور سے ملاقات کی جس میں ملک کی مجموعی خصوصاًسیاسی و معاشی صورتحال پر تبادلہ خیال کیا گیا۔ ملاقات میں پنجاب اسمبلی تحلیل ہونے کے بعد پیدا ہونے والی صورتحال پر بھی غور کیا گیا۔ سابق گورنر چوہدری محمد سرور نے کہا کہ پنجاب کی سیاست میں سید حسن مرتضی کا کردار قابل تعریف ہے۔پاکستان بالخصوص پنجاب کو سیاسی استحکام کی اشد ضرورت ہے۔سید حسن مرتضیٰ نے کہا کہ چوہدری سرور پرخلوص شخصیت کے مالک اور زیرک سیاستدان ہیں ۔پاکستان کو جی ایس ٹی پلس دلوانے میں چوہدری سرور کا کردار قابل تعریف ہے۔پنجاب اور کیلیفورنیا کو سسٹر پروونس ڈیکلئر کروانا بھی چوہدری سرور کا قابل تعریف کارنامہ ہے۔انہوں نے کہا کہ پیپلزپارٹی پنجاب میں انتخابات کے لیے بھرپور تیاری میں ہے۔
