لاہور( این این آئی) لاہور ہائیکورٹ نے پنجاب میں عام انتخابات کی تاریخ کا اعلان کرنے کے حوالے سے دائر متفرق درخواست پر الیکشن کمیشن اور گورنر پنجاب کو نوٹس جاری کر کے 9 فروری کو جواب طلب کرلیا ۔ لاہور ہائیکورٹ کے جسٹس جواد حسن نے منیر احمد کی درخواست پر سماعت کی ۔ درخواست گزار نے موقف اپنایا کہ الیکشن کمیشن نے بدنیتی کا مظاہرہ کرتے ہوئے قومی اسمبلی کے حلقوں کا ضمنی شیڈول جاری کردیا۔عام انتخابات کا شیڈول جاری نہ ہونے سے حلقے کے ووٹرز کااستحقاق مجروع ہورہا ہے۔صوبائی اسمبلی کی تحلیل کے نوے دن میں انتخابات کرانا آئینی تقاضہ ہے۔پنجاب اسمبلی کی تحلیل کے باوجود انتخابی شیڈول جاری نہ کرکے الیکشن کمیشن آئین سے انحراف کررہا ہے۔صاف شفاف انتخابات کیلئے انتخابی شیڈول کااجرا ء جمہوری اساس ہے۔آئین کے آرٹیکل105کے برعکس گورنر بدنیتی کی بنا ء پر انتخابی شیڈول جاری نہیں کررہے۔استدعا ہے عدالت الیکشن کمیشن کو پنجاب کے انتخابی شیڈول جاری کرنے کاحکم دے۔
